సాహిత్యంలో హాస్యం - 233

# ప్రార్థనా శ్లోకం
           మండుటెండలోన మర్రి నీడనుబోలి అభయహస్తమొకటి శుభము జూపు
           అదియె లేకయున్న అమ్మవో బొమ్మవో ఎవరు నిన్ను గూర్చి ఏడ్చువారు

# మేకపోతు గాంభీర్యం

మనకి ఎపుడైనా మనకంటే బలవంతులైన వారిచే ఆపద ఏర్పడ్డప్పుడు తెలివితేటలతో, మాటలతో తప్పించుకొనవచ్చును. దానికి ఒక జాతీయమే మేకపోతు గాంభీర్యం.

ఒకసారి ఒక మేకపోతు దారి తప్పి అడవిలోకి వెళ్ళిందట. భయపడుతూ ఉన్న ఆ మేకపోతుకి ఒక సింహం ఎదురైంది. అసలే భయపడుతూ ఉన్న ఆ మేకకి ఇక తను చావక తప్పదు అనిపించింది. కాని చనిపోయేముందు ఈ సింహం భారి నుండి తప్పించుకోడానికి తన వంతు ప్రయత్నం చేద్దాం అనుకుంది.  మేకపోతుని ఎప్పుడూ చూడని సింహం, ఆ మేకపోతుకి ఉన్న గడ్డాన్ని చూసి ఇలా ప్రశ్నించింది.
       "ఏంటి ఎవరు నీవు? వింతగా గడ్డం అలా పెంచావు. నా జూలు చూసావా ఎలా ఉందో". అప్పుడు ఒక మెరుపు లాంటి ఆలోచన ఆ మేకకు తట్టి ఇలా పలికింది -
                      "అహమేక శతం వ్యాఘ్రాం
                      పంచవింశతి కుంజరాన్
                      ఏక సింహంన భక్ష్యామి
                      గడ్డంతేన విముచ్యతే"

ఇప్పటి వరకు వంద పులులను చంపాను. ఇరువది అయిదు ఏనుగులను తిన్నాను. ఒక్క సింహాన్నైన తిననిదే ఈ గడ్డం తీయనని  ప్రతిజ్న చేసాను.  అది వినిన సింహం భయపడి పరుగో పరుగు. అద్గదీ మేకపోతు గాంభీర్యం అంటే.


- తెలివి తేటలు మనల్ని కాపాడుకోడానికి, పరులను రక్షించడానికి ఉపయోగించాలి కాని మోసం చేయడానికి కాదు
- తెలివి తేటలు పర భాషలోనే చదువుతే వస్తాయని కాదు. మాతృభాషలో అభ్యసించినా వస్తాయి. 30 ఏళ్లుగా ప్రభావితం చేస్తున్న ఆంగ్ల భాష డబ్బులు, ఉద్యోగాలు, భోగాలను ప్రోత్సహిస్తుంది.

# సూక్ష్మ దృష్టి - బొంగరం మీద (వెంకట పార్వతీశ్వరులు)
                 రింగు రింగున తిరుగునీ బొంగరంబు
                 ఏమి వ్రాయుచునున్నది ఈ ఇసుకలోన
                 బడికి పోలేదు పుత్తంబు పట్టలేదు
                 ఎట్లు వచ్చినదో దీనికింత చదువు


కవిత్వమనేది వస్తువులో ఉండదు. చూసేవాడి దృష్టిలో ఉంటుంది. కవిత్వానికి కావాల్సింది క్రాంత దర్శన. అదే సూక్ష్మ దృష్టి.

- పట్టుకోవాలని సీతాకోక చిలుక వెంబడి పడితే అది దొరకదు. అదే నువ్వు రాయిల కదలకుండా ఉండు. అదే నీ మీద వాలుతుంది. సుఖాలు కూడా అంతే. మనం వెంట పడితే పరుగెడతాయి. అదే ఏమి చేయకుంటే మన దగ్గరికే వస్తాయి